بيا دې نوي شراب څښلي دي پوهېږم

په رخسار دی ګل کرلي دي پوهېږم

که هزارځله لاس سره کړې په نکريزو

تا زما په وينو وللي دي پوهېږم

معرکه زما د مرګ نه ده نو څه ده

رقيبان چې تا بللې دي پوهېږم

چې رقيب و تا غوږونه وبله وروړه

ما هغه ساعت ژړلي دي پوهېږم

څه حاجت دی چې دې خط په ملا لولم

چې زما په باب دې کښلي دي پوهېږم

ته خپل جور و جفا څه وايې و ما ته

ما همه واړه ليدلي دي پوهېږم

رقيبان ځکه تېری په رحمان کاندي

تا په خوا پورې نېولي دي پوهېږم