که مې ونمانځي ساقي په يوه جام

تر دا هورته به ور څه وي احترام

بس دی ما لره دا فيض د شرابو

چې پرې پريونځم دا دلق ارزق فام

مېخواري که په عالم کې بدنامي ده

ما تر پښو دی لاندې کړی ننګ و نام

په مېزان يو سر لعل وي بل سرکاڼی

مساوي ده عاشقي په خاص وعام

عاشقان د سپين رخسار د تورو زلفو

څه پروا لري د کفر د اسلام

په مجنون باندې قلم راغلی نه دی

که حلال يې په مخ ورشي که حرام

حلال عشق دی په رحمان باندې راغلی

په حلالو کې مدام وي احترام