اشرف خان هجري
لکه زه یم ستا دیدن و ته مشتاق
شاید نه به وي مشتاق هسې عشاق
څو د عشق جیش دې کوز زما په زړه وي
دم په دم یې افزوني کا طمطراق
دا جنون د محبت چې ما ته پېښ دی
کښلی نه دی د هیڅ دور په اوراق
لکه ستا سترګې یې کا په خسته زړونو
هسې تاخت نه کا په چا بادا قزاق
سره یاقوت دې ځیګر وسول د تریو
اوس یې سیزي د بلاق په اور بلاق
هغه کس دې ستا د عشق په کوڅه نه ځي
چې ور نه کا نورو مینو ته طلاق
له شرفه به یې سر تر فلک تېر شي
که منزل کړي د هجري دواړه رواق