دا څه مخ دی منور

چې هم شمس دی هم قمر

دا څه زلفې دی مشکينې

چې هم مښک دی هم عنبر

دا څه پيوسته ابرو دي

چې هم نېش دی هم نشتر

دا څه سترګې دي قاتلې

چې هم سيف دي هم خنجر

دا څه شونډې دي می ګونې

چې هم می دی هم شکر

دا څه سپين سپېڅلي غاښ دي

چې هم در دی هم ګوهر

دا څه سبب زنخدان دی

چې هم سيم دی هم ثمر

دا څه قد او څه قامت دی

چې هم ګل دی هم عرعر

دا څه ملا ده باريک وضع

چې هم موی دی هم کمر

دا څه زړه دی د خوبانو

چې هم موم دی هم حجر

دا څه يار دی نه پوهېږم

چې هم دل دی هم دلبر

دا څه بت دی زما ربه

چې هم بت دی هم بشر

دا څه شعر د رحمان دی

چې هم ګنج دی هم هنر