چې په زړه باندې مې عشق جوړ که اساس

بیخ یې وکېښ له هغه د بل وسواس

که په تېغ مې ستا له دره مناهي کا

ستا په سر ګو که هرګز وکړم هراس

پس مې ووژنه په توره دیت نشته

یو نفس ځينې اول راکړه په لاس

مګر وروځو دې په وژلو کوتاهي کړه

چې دې خال کړو په رتبه تر دواړو پاس

هر چې کا د هجران غم په لړمانه کې

هسې نه کا کار په چا ریزه الماس

د فرقت پوځونه ډېره دلیري کا

ساقي پرېکړه تر معتاد د میو کاس

په دا لار به قاصد څه راځي له یاره

چې یې زر کروهه دروي زر یې مواس

زه دو شش نارې وهمه خال پیدا کا

فلک بیايي د خپل زړه په رضا طاس

لار همه راته مشکل شه ګوره څه شي

په ویل مې ګمان مه کړه د لباس

که هزار بلا ګردون درته پیدا کا

هجري مه کړه د مولا له فضله یاس