ستا په مینه هرګز مه شه مبتلا کس

مبتلا مه کړه مولی په دا بلا کس

چې مې غم د هجر ولید هسې وایم

چې هرګز له یاره رب مه کړه جدا کس

چې حرام ګڼي زاهده عشق د جونو

وایه کوم یو عیش په ځان کاندي روا کس

زه حیران په دا خبره یم یارانو

په دنیا بې یاره څرنګ کا خندا کس

د وقار نهال دې هسک وینم دلبره

د وصال میوه دې څشکل کا رجا کس

ستا زلفینو زخمي کړی نه رغیږي

که په ډېر ضرور یې وکاندي دوا کس

نور یې ډېر تر ماه و مهر منور دی

ځیر یې څشکله د مخ ګوري ضیا کس

د بوسې وعده دایم صبا برات کا

زړه به څو کاندي تازه په دا وینا کس

هیڅ باور په عمر نشته بې وفا دی

امید څرنګ په وعده کا د فردا کس

ستا د خوی جفا چې ما مشاهده کړه

په دنیا کې هومره نه لري جفا کس

جفاکار تر تا هرګز په جهان نشته

لکه نه لري هجري سیال په وفا کس