اشرف خان هجري
لکه تا ته عاشق سپک دی تر هلک خس
شاید نه وي په دنیا کې هسې سپک خس
بلکې تا ته لکه ورک وقار د یار دی
هرګز نه وي په عالم کې هسې ورک خس
چې مې کیف ستا د سترګو تجربه کړو
می همه راته ظاهر شو د بتک خس
لکه ستا نظر وجود د عقل هیڅ کا
مګر هیڅ هسې ګولۍ کا د ټوپک خس
ما چې ولیدو لذت د هغو لبو
تر نسبت یې نبات وینم د اټک خس
رقیب هسې بد خصلت په جهان خس که
څو په طیرو کې وقار د ښاپیرک خس
ستا د مینې لاس مې تن هسې ریزه کړ
لکه څوک په زور ریزه کا د کوتک خس
عاشق خپلې مینې تا ته هسې خس کړ
څو په درست خټک کې ذات د در ملک خس
په هر ځای یې قدر ډېر دی تر پهاړه
خو و تا ته که خپل زړه هجري خټک خس