اشرف خان هجري
ستا له مینې به زړه کله شي زما بس
ما غریب سره له تا نه دا بلا بس
نه شکیب د عاشق شي د یار له کویه
نه خاطر د حریص کاندي له دنیا بس
په خلوت چې ته رقیب پوښتې له حاله
مګر مرګ لره مې نه ده دا جفا بس
ما جفا ته ستا په مینه هسې شا کړه
لکه ستا خصلت چې وکړه له وفا بس
ساقي نن روغو ته ست کوه د میو
ما خراب ته ازلي د عشق صهبا بس
بېهوده نصیحت ولې کړې واعظه!
زما زړه به هرګز نشي له اشنا بس
ته روا عمل کوه چې نوم دې ښه شي
ما هجري لره دې زشت و ناروا بس