اشرف خان هجري
چې لذت د جوړه لبو دی د یار خوږ
هسې نه دی نیشکر د هندوبار خوږ
هیڅ خواږه به یې په شان د لبو نه وي
ګوندې وي په مزه هسې دا اشعار خوږ
زر په زر یې شیریني هجر ګنډیر کا
که هر څو وي په دنیا د وصال وار خوږ
زمانه یې لاس په لاس په ژړا سر کا
که هر څو دیدن د ګل وي په هزار خوږ
چې دلبر ګل و مل چا ته مسیر شي
بل به نه وي په جهان دا هسې کار خوږ
غنیمت ګڼه دا کار همېشه نه وي
په چا نه لري فلک ساعت قرار خوږ
هجري ځکه هومره ناز په طبیعت کا
چې په دهر تر ده نشته په ګفتار خوږ