اشرف خان هجري
لکه هجر که زما په زړه بنیاد
هسې داغ به هرګز نه وي د چا یاد
چې لا نه دی اوبه شوی له غمونو
د زړه سر مې مشدد دی تر فولاد
هر ستم چې مئین کا چاره مې نشته
د دلبر له جوره نه کا څوک فریاد
ما به سل ځله فریاد هم په چا وکه
که موندلی چا د دوی له جوره داد
د هجران الم به ما زیر و زبر کا
ستا د وصل څو راورسي معیاد
خاصیت د زمانې په ځيره ګوره
باوجود رڼا د لمر واړه سواد
تا به کله هومره شندې په هجري کړې
که یې صبر ستا له مینې کړي فواد