اشرف خان هجري
یا بیجن وه د هغه چاه په غم بند
یا مې زړه که یار د زلفو په خم بند
بیجن هم رستم رها کړو له زندانه
عشق مې تل زړه ته پیدا که د غم بند
هغه دم چې ستا د زلفو په خم بند شه
نور یې وشلوه له پښو د عالم بند
چې په خم د زلفو بند نجات یې نشته
کله چا ولیده خلاص په ارقم بند
که فریاد په قاضي کړم ګیله دې نه وي
ستا طرو کړو زما زړه په ستم بند
څو د یار مینه زما په زړه رقم ده
هومره سخت په کاغذ نه وي قلم بند
زه هجري هله ازاد وم په جهان کې
چې مې نه وه زړه په زلف د صنم بند