اشرف خان هجري
چې د شپې په لمن څوک وکا الحاح
مطلبونه یې رب واړه کا انجاح
د تقوا لمن مضبوطه کړه په لاسو
که پکار دې له دوزخه دی فلاح
تر دا لویې ګناه بل مه ګڼه په دور
چې ملال کړي په ناحق د چا ارواح
دا وینا باطله مه شمېره جاهله!
په داوو یې دی متفق اهل صلاح
چې ګناه له چا صادر شي بهتري ده
که مستور یې کړو د عففوې په اجناح
ستا په مخکې خوني یم پورې به نشي
مګر نیک عمل بیړۍ کړه هم ملاح
له هغو به څه امید د خیریت وي
چې بېغمه حرام خوري لکه مباح
بده وینه به د تن ښار خراب کا
که یې رګ د خروج وا نه کا جراح
د ابلیس خبیث حرص درته تعین دی
پټ سپاهي کړه ځان د خیره په صلاح
اې هجري که وسیله د جنت غواړې
د پرهیز ناوې زوجه کړه په نکاح