اشرف خان هجري
و خالق ته چې څوک کا سحر الحاح
زر پیدا کا د قبول اثر الحاح
په تا هیچرې تاثیر د فریاد نشي
عاشقان دې کا همېش په درالحاح
د ښایست کبر که ووځي ستا له سره
هله واورې ته د چا مګر الحاح
نن ژړا د خلقو اوره چې وار تېر شي
و به نه کا درته هیڅ بشر الحاح
ستا په زړه به د الطاف اثر ونشي
که له ګوره درته کا اکبر الحاح
فغان سل ځله فغان ستا له ستمه
چې هیڅ نه لري له تا شمر الحاح
یو بوسه دې په هزار منته غواړي
کله اوري د هجري احقر الحاح