اشرف خان هجري
په دنیا به هسې نه وي څوک سبک روح
څو لري تل شګفته یار د خټک روح
یو نظر یې هسې زړه له تنه یوسي
لکه رانسي له چا تېر د ټوپک روح
عاشق زړه هسې د یار په زلفو بای کړو
لکه بای کړو ګدایانو په ښانک روح
نه عاشق د یار له عشقه صبر کاندي
نه شکیب له شیرینۍ کا د هلک روح
زړه مې هسې د یار هجر په اور سیزي
څو ورتیږي په دوزخ د بد ملک روح
تش صورت د خټک شته په بیجاپور کې
تل یې سیر پورې کاندي تر اټک روح
هجري هسې خام عاشق نه دی دلبره
چې دربان دې هیبت کا په کوتک روح