چې یې ولیده دلبره ستا ښایست

شکست وخوړ د قمر والا ښایست

لکه ستا حسن عالم زیر و زبر کړه

وران به نه کا هسې ملک د چا ښایست

ډېر دلبر دي په جهان کې ما لیدلي

په دید نکړو ستا په مثل ما ښایست

چې یې سیال د حسن پرېنښود په دور

صد رحمت شه ستا د مخ په دا ښایست

څو بازر د خلقت ګرم په جهان شه

دایم نه اوسي یوځای وفا ښایست

هجري یار که وفا نلري معذور دی

هرګز نه وي له جفا تنها ښایست

ما چې ولیدو په سترګو دا والا بت

شاید نه به وي دا هسې په دنیا بت

خپل بتان به اذر واړه په اور کېښول

په ژوندون که یې لیدلی وي زما بت

دا چې نن یې زما زړه یوړ له تنه

هسې نه وه پخوا هم د هیڅ شیدا بت

زما بت بنده د حق زه پرې عاشق یم

هرګز نه وینم کافره ستا بلا بت

رسېدل مولا ته هومره مشکل نه دي

که حایل په میان کې نه وي د هوا بت

ولایت به د مطلب په حیات خپل کړي

که نابود کړې په کوشش د عمل دا بت

هغه رب زما خالق په لا شریک دی

هجري مات لکه خلیل کړه ناروا بت