کباب دل به مې تازه نه کا شراب

وچه ونه خو مریمې کړه په تاب

تېښته مګړه د ګردون له نوائبه

دام دې نه شلوي مرغۍ په اضطراب

هر بشر د مراتب په قدر کار کا

نیوی نشي د باشین صید عقاب

که عقاب حمله د چتي په نیوه کا

په منګلو به یې وری شي تراب

د مئین ژوندون مشکل دی بې صنمه

د ماهي موت دی خشکی حیات دریاب

کواکب په ژړا شمیرم نه تېریږي

طولاني ده د فرقت شپه تر حساب

صفا دل دې جګړه نه کا له بد ذاتو

بحر نشي که غوغا کاندي سیلاب

د حیلې لومه به بند د صادق نشي

نهنګ کله برې حصار کا د ګرداب

که د قدر سر لرې سداد پیشه کړه

د راستۍ په مجلس کوز ګوري قلاب

صادقان به ولې ډار کا له کذابو

نهایت دې کار مطعون ګڼه کذاب

هجري ستا په ژړا دور نه خمیږي

دل سوزي په مژونو کله کا قصاب