اشرف خان هجري
چې دایم دې وي له زړه سحر مصحوب
هم هغه دی په دنیا کې ستا مطلوب
څو یې حسن ګیرنده د زړونو نه وي
په زور نشي څوک هرګز د چا محبوب
ډېر جدل عاشق واصل په مطلب نه کا
څو یې زړه د عشق په کار نشي مرغوب
د وصال سحر یې ګډ په خرمۍ کا
که د هجر شپه مئین کاندي مکروب
په هجران کې یې نظر د سترګو کم کړ
بیا بینا شه د یوسف په مخ یعقوب
د عشق جیش یې هسې زور راباندې وکړ
چې یې عقل له دماغه کړو مسلوب
هغه دم په ما هجري عیداکبر دی
چې نازل شي دکن د یار مکتوب