چې اغاز د زړونو بند لره تدبیر کا

تورې زلفې هله ځيل غوندې ځنځير کا

څو خمونه یې موجود شي په ځنځير کې

هومره زړونه په هغه ځيل کې اسیر کا

په کوڅه یې د عشق مه ورځه مالداره!

په نګاه به دې مجنون غوندې فقیر کا

څو شیران زلمي زخمي کا په ساعت کې

چې د وروځو په لینده د بڼو تېر کا

په تاراج یې حیله نه کا تورې وروځې

خال په کوم جرم ترې بر لکه امیر کا

رنګ و بوی به یې ثاني د بدن نشي

که کافور څوک په ګلابو کې خمیر کا

په کالونو به یې شمار ترسره نشي

که حساب یې د ښایست څوک په ضمیر کا

د خوبۍ په ښکار یې خلق په اور کیدي

چې اوربل لکه خسرو ټیکه وزیر کا

ښایسته جونه غره د مخ په زیب دی

په کثرت د مال که فخر عالمګیر کا

هجري سخت هغه سړی وي په دنیا کې

چې نامي صنمې خاورو ته مصیر کا