دل شده همه بدر شول سناسیان ستا

ځکه تل په ایرو رغړي په استان ستا

په دا حال به دې له دره تیښت و نه کا

که همه تر تورو تېر کا جلادان ستا

که یې منع څوک په زور کا ګمان مه کړه

چې د زړه مهر به نور کا عاشقان ستا

څوک دې ځکه ژوندی نه ځي له درباره

چې هر یو قوت د شیر لري سګان ستا

له ښایسته به دې کله څوک خبر وه

زما مینې نام نامي کړو په جهان ستا

ما سنګدل لیدلي ډېر دي په دنیا کې

ولې تېر دي تر همه ؤ نوکران ستا

چې دې حسن ما څرګند که نو دې غل شوم

چې مې تل شړي له دره نګهبان ستا

لکه تېره شوه لیلا نوم یې باقي دی

تل به هسې وي بیا باد زیب زمان ستا

د ریاض بازار به څه کړم چې ته نه یې

ګل هرګز په څهره نه وي د بوستان ستا

زه خټک دې قسم کړم په تورو سترګو

که راڼۍ وي په صورت د هندوستان ستا

کافر نه کا هومره قصد له مسلمانه

لکه وکا په عاشق باندې هجران ستا

تر پالنګه به دې یو ځل هجري ورشي

که په زرو راضي کیږي دربانان ستا