اشرف خان هجري
زړه چې یاد د هغه تېر عمر نوبت کا
زما تن لره تجویز د اور صحبت کا
ګذشته عمر په زور غواړئ یارانو
مضاعم یې چا لیده چې بیا رجعت کا
صرفه نه کاندي هجران زما په وژله
د قضا منت راباندې لا مهلت کا
د دې شنه ګردون په ګشت کې څه اثر دی
چې په دم عشرت زحمت زحمت عشرت کا
صد هزار ځایه ښادي چیرې ژړا شي
هر زمان چې اهنګ ساز د حرکت کا
روغه نه کاندي هرګز له ازادو
مګر لږ مهر د کل سره نسبت کا
که ګهې د مقصد لاس ورکا په لاس کې
هغه هم په رښتیا نه وي حرافت کا
زمانه به خپل روش هرګز پرینږدي
که څوک شکر ترې همېش یا شکایت کا
د ژړا سیل مې جوړه کسي لاهو کړه
کله زړه د دهر سوړ شه لا شدت کا
هره شپه د دې فاني جهان که ګورې
ډېر کارونه تولد د قباحت کا
په راحت یې فریب مه خوره باقي نه ده
په ارمان به دې ترې تېر په لږ مدت کا
نن فلک له هجري غم کا راشه ګوره
چې پیدا د هجري څه شکل حمایت کا