اشرف خان هجري
په ښه مخ چې ول د تورو زلفو مات کا
په هزار غمه اخته زما اوقات کا
راشه یو دیدن په ځای د دِیّت ورکړه
تا ویشتلی اشفته ګوره وفات کا
چې دې حسن ته څوک وګوري حیران شي
په پاکۍ د مولا یاد اسم د ذات کا
ستا د مخ په دود به یو ښایسته نه وي
که هر څو بتان ښایست د سومنات کا
په آرسی که ثاني بدر هویدا شي
هر ساعت چې پرسیده د مخ ایات کا
مرتضی غوندې غازي په دوران بویه
چې په لاس د عدل مات بدن د لات کا
بلبل تل د ګل تعریف کا په ریاض کې
هجري تل د خپل اشنا د مخ صفات کا