رحمت الله درد د ۱۹۳۴ ز کال د ډیسمبر پر ۴ د خیبر پښتونخوا د جنوبي سیمې لکي مروت په مستي خیل سیمه کې د نظام خان کره زېږېدلی و. لومړنۍ زده کړې يې تر لسم ټولگي پورې د (لکي مروت په های سکول) ښوونځي کې وکړې. دولسم ټولگی يې د بنو گورنمت کالج کې پای ته ورساوه او څوارلسم ټولگی يې هم د ديره اسماعيل خان په حکومتي کالج کې پاس کړ. وروسته يې د ماسټرۍ او بي ټي سندونه له پېښور پوهنتون څخه تر لاسه کړل. ارواښاد درد د شاعرۍ تر څنګ په بېلابېلو دولتي ښوونځيو کې د استادۍ دنده هم ترسره کړې وه او په ١٩٩٥میلادي کال کې د لکي مروت دولتي کالج نه د سر ښوونکي په توګه تقاعد شوى و. نوموړي رسمي دنده د یو ښوونکي په توگه پيل کړې وه او وروسته بيا د پروفيسرۍ تر رتبې ورسېد. پروفيسر رحمت الله درد د ۲۰۱۶ زېږدي (۱۳۹۵ ل ل) کال د اگسټ پر ۳۱ د ۸۲ کالو په عمر له دې نړۍ سترگې پټې کړې او په خپله پلرنۍ هديره کې خاورو ته وسپارل شو. اروا يې ښاده او جنت يې ځای شه. اووه ټولګې شاعري یې د (غزل، درد، منتخب درد، وفا، نون نه تر نون، هغه سترګې چې غږیږي او ویال سړی) په نومونو نشر شوې دي. په دې وروستيو کې يې ټوله شاعري د «کليات درد» په نامه چاپ شوې چې په وروستۍ برخه کې يې د ارواښاد درد اردو شاعري هم ځاى پر ځای شوې ده.