رحمت شاه سائل (Rahmatshah Sayel) د پښتو ژبې مشهور شاعر دی چې د شعرونو گڼ شمېر ټولگې يې خپرې شوي. نوموړی د امين گل زوی دی چې په ۱۳۲۸ هـ ل کال کې د پېښور د ملاکنډ ايجنسۍ د درگی سيمې د ورتير کلي کې زېږېدلی دی. زده کړه يې تر څلورم ټولگي پورې کړې، خو په ليک لوست ډېر ښه پوهيږي. له ماشومتوبه يي د ورځپاڼو له لوستلو سره مينه پيدا شوه او تل به يي لوستلې. تر دې چې ليکل او لوستل يي پوره پکې زده کړل او بيا خو يي وروسته آن مقالې هم ورته ليکلې. له ماشومتوبه یې په شعر ويلو پيل کړی. خپل لومړنى شعر یې په ١٣ کلنۍ کې ووايه او بيا يې شل کاله وروسته خپل لومړنى کتاب چاپ کړ. اوسمهال یې د چاپ شویو آثارو شمېر ۱۱ ته رسیږي. 1. د وير په چم کې وار د نغمو دی - شعري ټولگه 2. د لمبو په سيوري - شعري ټولگه 3. د ښايستونو د سپرلي بادونه - شعري ټولگه 4. درد چې د څړيکو څانگې وسپړلې - شعري ټولگه 5. د وينو رنگ په لمبو څنگه ښکاري؟ - شعري ټولگه 6. تا له تصوير په گلاب جوړ کړم که نه - شعري ټولگه 7. د چينارونو نه لمبې ووتې - شعري ټولگه 8. حالات چې اور اوروي - شعري ټولگه 9. ته به په خپل تصوير کې څوک ځايوي - شعري ټولگه 10. زه د خزان د پاڼې پاڼې سره ورژېدم - شعري ټولگه 11. آخري سندره – افسانې