عبدالحمید مومند
چې باله شي کروفر د دنیا هیڅ
هیڅ سړی به کاندي فخر په دا هیڅ
د نابودې دنیا بود برق و برېښنا ده
نه شي زېرمه د برېښنا په رڼا هیڅ
د دنیا هوی هوس د خوب لیده دي
چې خوب وړی شي راويښ نه وي بیا هیڅ
هر سړی درومي تریخ خلق له دې جهانه
خوږه کړې يې خوا نه ده د چا هیڅ
که هر څوک يې جنګ جدل په دنیا وکا
ځنې یو نه وړه سکندر و دارا هیڅ
چې يې څوک په ټګۍ پوه وي هغه نه کا
په بازار د دنیا سود و سودا هیڅ
چې ساتلی نه شي پت د اشنايۍ
اشنايي ده د دنیا د اشنا هیڅ
دا نیمګړې هیچا نه ده پوره کړې
تر برېښنا يې زیاته نه ده یقا هیڅ
چې پروا په دنیا
نه لري حمیده!
هغه نه لري د خلقو پروا هیڅ