عبدالحمید مومند
که هر څو په جار پاڅي په جار کښېني
چې د بل په در کښېني په دار کښېني
دا خواري په خوارۍ مه ګڼه دولت دی
چې په خپل پوزي څوک خوار وزار کښېني
ورک هغه ناست و ولاړ شه که په تخت وي
چې مدام په و یاړ پاڅي په ویاړ کښېني
سپک به پاڅي د هغه مسند له سره
چې په سر د غریبانو خونخوار کښېني
دلجويي د خلقو کړه د ځان په سولو
که د شمعې په څېر بل رویدار کښېني
ولې نه کړي د مظلوم له آهه وېره
ولې مخ ته د سېلاب قرار کښېني
چې نه وخوري نه يې ورکړي مه يې وینه
که په ګنج باندې په څېر د مار کښېني
دا دنیا صحت خانه شمېره حمیده!
چې خوشحال ځنې پاڅي آزار کښېني
سرخرويي به یې د لعلو شي حمیده!
که په خاورو کې له خاورو خوار کښېني