عبدالحمید مومند
بې ژړا مې کسي سوځي په لېمو کې
د اوبو زاییده پايي په اوبو کې
په سړو کې به ځان هومره حساب نه کړم
څو حساب نه یم د یار د در په سپو کې
رقیبان راته هر ګوره د یار ډېر شو
یو سړی څه کا د ډېرو سپو په خولو کې
چې قدم مې د آشنا په کوڅه کېښود
د سر سترګې مې بینا شوې په تلو کې
هسې کار په ما خندا وکا د ترکو
لکه ووژني یو بل په مسخرو کې
راکړه مه شه د ناصح توبه په عشق کې
لا يې کار زما اوتر کا په توبو کې
چې زما د کږوو یار کاندي کوتار شي
د ګلرخ د کږو وروځو په کږو کې
هر ساعت لکه خلیل په عاشقۍ کې
تماشه کړم د ګلزار په سرو لمبو کې
چې هیچرې په پارسي کې مونده نه شي
هسې ساز دی حمید ایښی په پښتو کې
فارسیانو د حیرت ګوتې په غاښ کړې
چې حمید سخن سازي کا په پښتو کې