چې دا کښلې توره راغی یار د چا دی

چې جواب ته شي ور وړاندې کار د چا دی

چې خطا خطا ګوزار کا رسا لګي

دا صحیح او کم خطا ګوزار د چا دی

دا خوبان دي چې په جور سرخ روی کېږي

ګڼه تود ظلم زور بازار د چا دی

هر یو ښکلی مې په زړه د باز غوټې کا

ګوره کوم یو به يې یوسي ښکار د چا دی

عاشقي په اختیار نه کېږي هوښیار شه

ځان و اور ته اچول اختیار د چا دی

چې يې ګرځي عاشقان واړه بېدله

نه پوهېږم چې دلدار دلدار د چا دی

چې خپل یار ورلره ورشي په پوښتنه

دغه هسې بختور آزار د چا دی

چې يې ورک د خلقو خوب په ډېر زګیروي کا

دا د زړه په سر زخمي افګار د چا دی

په داغلي زړه شاکر اوسه حمیده!

په هر ځای و مخ ته ساز ګلزار د چا دی