چې نظر کړم د خوبانو و رخسار ته

آیینې غوندې حیران شم و دې کار ته

صافه نه ده آیینه د هغو زړونو

چې حیران نه شي د ښکلیو و دیدار ته

له اورېځ تر اوبو ډېر کاڼي ورېږي

څه امید دی د خوبانو و ریبار ته

د ګفتار و د اظهار حاجت يې نه وي

پټه خوله سوال و جواب کا یار و یار ته

که له غمه يې زړګی دوه نیمه وچوي

نه نیسي د مهر سپر و ذوالفقار ته

چې يې نه ویني وفا په رنګ و بوی کې

زرکه ځکه مینه نه کا و ګلزار ته

څو يې صبر و زهد ګواښ ته وړاندې نه شي

لا يې حب د ښکلیو ځان ګواښي ګوزار ته

په لباس د ښکلیو مه غولېږه حمیده

بېش بها رختونه نه وځي بازار ته