ځکه نه لري پروا بتان د مشکو

هر کمند لري د زلفو کان د مشکو

چې يې دلته یاد په زلفو برابر شي

په ختن کې کا قیمت ارزان د مشکو

که اور نه وای جدايي د آهو چشمو

نه به و هسې تور شوی ځان د مشکو

زلزله د یار د خط د راتلو ګوره

نړوي مې په تندي آسمان د مشکو

چې اورېځ د یار د خط په خاطر راشي

اوروي مې تر لېمو باران د مشکو

چې له غمه يې د خط سر په ګرېوان کړم

شي مې ډک لکه نافه ګرېوان د مشکو

دا یې خط نشوونما کاندي په مخ کې

که په ځمکه ځي د نمر کاروان د مشکو

دا د ترکو د مشکینو زلفو تور دی

چې وګړي پرې کوي ګمان د مشکو

دا شرف د عاشقۍ نه دی نور څه دی

چې سینه شوه د حمید دکان د مشکو