که و مینې ته د ترکو، بلا وایم

هیڅ دروغ په دا کې نشته رښتیا وایم

بل سبب په ما باعث نه دی بې عشقه

چې مدام د ویرژلیو وینا وایم

نه زوی مړی نه ورور مړی، یم بې مړیه

شپه و ورځ د ویر وینا په ژړا وایم

دا همه واړه د مینې محتاجي ده

چې هلک ته سپینه ږیره بابا وایم

چې مې نه راځي په واک هر چې راکېږي

واړه چارې د خپل زړه دي له چا وایم

وله ځان اور و اوبو ته، مینه مه کړه

واقعي له نېک خواهۍ درته دا وایم

که دفتر د آشنايۍ کړې پاڼې پاڼې

بیا به نه مومې یو حرف د وفا، وایم

دا په دین د محبت لویه خطا ده

چې خطا و ته د ترکو خطا وایم

نا آشناوو څخه ځای د ګیلې نشته

هر چې وایم زه حمید له آشنا وایم