عبدالحمید مومند
څو اېرې نه شي په مینه د حبیب څوک
تور به نه کا په بل شان مخ د رقیب څوک
کله شي له لېونو د روغو چارې
عاشقان څوک، ادبونه د ادیب څوک
په خپل ځان بدي د هیچا پېرزو نه ده
باري نه شي بدلولی خپل نصیب څوک
په راتله د خط چمن حسن ایمن شي
خدای دې نه کا په کفارو کې غریب څوک
څو شبنم غوندې شبګیر په سر وانخلي
په جوار به د ګلرخ نه شي قریب څوک
محض مرګ ته مینې ونیوم د ترکو
کشکې راولي ناصح د مرګ طبیب څوک
له داغلي زړه فریاد عبدالحمید کا
که شړي له لاله زاره عندلیب څوک