عبدالحمید مومند
د هجران له لاسه وکړم په چا عرض
څوک به غواړي له دې دېوه زما عرض
دا بې نیاوه بادشاهي د ترکو واوړه
چې په در يې نه قبلیږي د چا عرض
لا يې تېغ د بې رحمۍ راته تېره شي
چې ور پاڅم وچ هډوکي په دا عرض
هر مظلوم له ظلمه سپک شي چې عرض وکا
بارې دروند د ظلم بار کا په ما عرض
وچ ګوګل، زېړه ګونه، اوښلنې سترګې
ګوښی ګوښی کا زما په آشنا عرض
آیينې غوندې خوله پټه سوال جواب کا
مناسب نه دی و یار ته رسوا عرض
اندېښنې د یار د تلو شوې تر شمار تېرې
رسوم د کومې کومې وینا عرض
په بېداد فلک چې څوک داد و فریاد کا
دا دانه کا بېهوده په آسیا عرض
شپه او ورځ يې د هجرانه په ګردش وي
وزګار نه دی چې به واوري زما عرض
که ګلرخ و ته ستا لار نه شي حمیده!
خپل احوال کړه په نسیم د سبا عرض